दुर्गा पंगेनी :-
गीत समिक्षा : ‘मायालु आजैलाई’-ठूलो लगानीको
कमजोर भिडियो ।
प्राय सर्जकहरूका
गीतहरू प्रतीक्षा गरिएको हुन्छ । जस्तो कि
वसन्त फिल्म्सका प्रोप्राइटर ईश्वर काफ्ले पाल्पाली ले आफ्नो कम्पनीले नयाँ गीत
बनाउँदै गरेको र त्यो गीत प्रति आफू निकै आशावादी रहेको बताइरहँदा मैले त्यो गीतको
निर्माणमा संलग्न रहने कलाकारहरूको बारेमा पनि चासो राखेको थिएँ । चर्चित सर्जक
प्रह्लाद सुबेदीको शब्द संयोजनमा गीत ल्याउन लागेको काफ्ले ले बताए सँगै यो गीत
मेरोलागि प्रतीक्षाको गीत बनेको थियो ।
निराश बनाउने गीत :
महत्त्वपूर्ण कुरा भनेको अहिलेको समयका चर्चित सर्जक र मनग्य लगानी गर्ने कम्पनीको
सहकार्य हुनु भनेकै बेग्लै खाले संयोग हो । विरलै हुने यो संयोगले दिने सृजना पनि
पक्कै दर्शक को मन छुने खाले नै हुनुपर्छ भन्ने मेरो विश्वास रहेको थियो । किनभने ‘लगानी र सही सृजना’ को भेट विरलै
हुने गरेको देखिन्छ । जहिले पनि एक जना
शुभचिन्तक को चाहना के हुने रहेछ भने – यस्ता कालजयी सृजना
दिँदै आएका स्रष्टा र लगानीकर्ता ले सहकार्य गरेपछि त्यो आउट पुट पनि ऐतिहासिक नै
आउँछ भन्ने सबैको चाहाना हुने रहेछ । तर वसन्त फिल्म मार्फत आएको ‘मायालु आजैलाई’ भन्ने गीतको भिडियोले आशा गरे अनुरूप उत्साहित
बनाउन सकेन ।
शब्द :- प्रह्लाद सुबेदीको शब्द संयोजन या लेखनको म
सुरुवाती समय देखिकै फ्यान हुँ । उनका धेरै गीतहरू मैले निरन्तर सुन्दै आइरहेको छु
। यो गीतमा भने ‘खुलेर पिरती लाम्ला, घरमै छोडी
आम कि त लाजै लाई’ थेगो भन्दा बाहेकका शब्दहरूले श्रोताहरू
लाई गीतमा अल्झाएर राख्ने सामर्थ्य बोकेका छैनन् । अनुप्रास मिलाउनको लागि
अङ्ग्रेजी शब्दको प्रयोग गरेर ‘समरी’ को
पछाडि ‘नमरी’ टाँस्नुपर्ने अवस्था
आइपरेको रहेछ । आम रूपमा भन्दा हतारमा तयार भएको सृजना जस्तो सुनिन्छ । उनले सरल
तरिकाले काम चलाऊ शब्द पस्केका छन् ।
लय, भाका,
सङ्गीत : लय नयाँ छ । खासै
पुराना गीत सँग प्रभावित भएको जस्तो लाग्दैन । अचेल लोक भाका एक अर्का सँग जुधेको
भनेर धेरै चर्चा चल्ने गरे पनि खेम सेन्चुरी को
यो भाका माथि त्यस्तो आरोप आउने
सम्भावना देखिँदैन । भाका र गायकी मनछुने छ तर भाका निकै हिट हुने र जनजिब्रोमा झुन्डिने खालको भने होइन । गीतमा केही बेर उभिएर
सुनिरहूँ लाग्ने मिठास छ तर गाउनको लागि भने असजिलो छ। लय सुमधुर भए पनि जन जिब्रोमा ट्याक्कै झुन्डिने र जनबोलीमा ठ्याकै
बस्ने भाका भने यो होइन । भरपुर मिठास र कर्ण प्रियताको बाबजुद यो भाका लोकले गाउनको लागि असजिलो छ । गाउनको असजिला
गीत पनि हिट हुन्छन जस्तै ‘राम्दी पुल’ गाउनको लागि असजिलो भएपनि हिट छ तर यो गीत ‘सुपर हिट’ म्याटेरियल चाहिँ होइन ।
स्वर : खेम सेन्चुरी र शान्ति श्री परियार : खेम सेन्चुरीको
स्वर सधैँ झैँ राम्रो छ । अन्य गीतमा
भन्दा यसमा खेम सेन्चुरी ले ‘गायकी’
मा निकै मेहनत गरेका छन् र बडो मिहिन पाराले सुर ताल सँग खेलेका छन्
गहिरोसँग । गायिका शान्ति श्री परियारको स्वर सधैँ झैँ उत्कृष्ट छ । गीतमा गम्भीर
किसिमको स्वर र गायकी छ । खोट लगाउने ठाउँ छैन तर खेम सेन्चुरीको ठाउँमा कोही
चल्तीको गायकले यो गीत गएको भए स्वाभाविक रूपमा यसको भ्यु मा असर पर्ने थियो ।
भिडियो : निर्माताले
आफू निकै आशावादी रहेको भनेको गीतको भिडियो निर्माण पक्ष एकदमै कमजोर छ । भिडियो
को सुरुवातमा राखिएको अदालत को सेट र त्यहाँ गरिएको अभिनय नितान्त बनावटी र
अनावश्यक जस्तो देखिन्छ । कलाकारहरूले बडो बनावटी अभिनय गरेको कारण त्यो अदालतको
सेट अस्वाभाविक लाग्छ । त्यो बाहेक को नृत्य समेटिएका फ्रेम हरू पनि
हेरिरहूँ लाग्ने छैनन् । गीत लाई सर्जकको कथामा बगाउन खोजेजस्तो देखिन्छ त्यसैले
होला अदालतमा सर्जकलाई “सिर्जना कर्ता’ भनेर फैसला
सुनाइएको छ । यही गीतका हरेक अन्तरालाई सर्जकको जीवनकै ‘अध्याय’
को रूपमा प्रस्तुत गरेर भिडियो ले प्रह्लाद सुवेदीको आजसम्मको प्रमोसन
गर्न खोजेको होला तर समग्रमा भिडियोले उनको कामको अवमूल्यन गरेको जस्तो देखिन्छ ।
अन्य : ड्रेस डिजाइन मध्यम छ
। मेकअप ठिकै छ । लोकेसन, सुटिङ सेट
कमजोर छ । मनोरम दृश्य हरू कैद गरिएका आउट डोर लोकेसन हरू छैनन् । धेरै ठुलो
स्केलमा खिचिएको छैन जम्मा आठ आठ जना कोरस को जोडी घुमाएर गीतलाई गरिब बनाइएको छ ।
लगानी अनुसार निर्देशन क्रान्ति केसीले मेहनत गरेकै भएर यत्तिको भिडियो बनेको
हुनुपर्छ । कोरस मा लाग्ने खर्च नायिका निता ढुङ्गाना तर्फ लगानी भएको कारण कम
कोरस राखेजस्तो देखिन्छ । नत्र ठुला लगानीका भिडियोहरुमा यथेष्ट कोरसहरू नाचेको
देख्न पाइन्थ्यो । बिच बिचमा निता ले गरेका नृत्यका केही छोटा स्टेप हरू चाखलाग्दा
छन् निता सँग मोडल ओबी रायमाझी को जोडी राम्रो देखिएको छ ।
निर्देशन: निर्देशक
क्रान्ति आशा लाग्दा निर्देशक हुन् । उनले बनाएका धेरै भिडियोहरु लोक दोहोरीको क्षेत्रमा चर्चित भएका
पनि छन् तर यो भिडियो उनको करियर को उत्कृष्ट भिडियो भने होइन । आशा गरौँ भोलिका
दिनमा उनले लोक गीतका भिडियो मार्फत मनोरञ्जन क्षेत्रलाई अझ नयाँ उचाइ दिनेछन् ।
यो गीतको निर्देशन पनि उनले आफ्नो तर्फबाट राम्रो गर्ने प्रयास गरेका छन् । यो भिडियो लाई ‘एक्स्ट्रा
अर्डिनरि’ भन्न अथवा असाधारण राम्रो भिडियो भन्न मिल्दैन ।
यो क्रान्तिको काम चलाउ भिडियो हो ।
युट्युब च्यानल र
डिजिटल प्लेटफर्ममा गीतको पर्फर्मेन्स को बारेमा, भ्युज,
लाइक,डिसलाइक, सेयर,
कमेन्ट लगायत पब्लिक इन्गेजमेन्ट को बारेमा कुरा गर्नु पर्दा यो
यौटा मध्यम स्तरको गीत हो । यसको भिडियोले दर्शक लाई अल्झाएर राख्न सक्दैन ।
यो गीत माथि गरिएको लगानी मार्फत वसन्त फिल्म्सले आफ्नो च्यानल स्थापित गर्न सक्नुपर्ने हो । लगानी बराबरको युट्युब रिभेन्यु आशा गर्न त सकिँदैन तर यस गीतले च्यानलमा सब्क्राईबर ह्वात्तै नबढाए पनि गीतको लोकप्रियता संगै दश लाख जति भ्यु जाँदा एक प्रतिसत् को दरले च्यानलमा बढोत्तरी हुन सक्छ ! त्यो अनुपात सह्रानीय मान्नुपर्छ। ‘साथी भाइ सँगको सहकार्यका रूपमा’ यो गीतमा गरिएको लगानी सम्झनाको लागि मात्र राम्रो होला ब्यबसायिक रूपमा नोक्सान गराएको छ । यो गीत लाई अब्बल सर्जक प्रह्लाद सुबेदीको मध्यम कोटीको सृजना हो भनेर भन्दा या मूल्याङ्कन गर्दा यो गीतमाथि अन्याय हुँदैन, गायक खेम सेन्चुरी को लागि भने यो लय र यो मिहिन गायकी कोशे ढुंगा बन्न सक्छ, किन भने लय र गायकी नै यो गीत चल्नुको मुख्य आधार हुन् – धन्यवाद नमस्कार
No comments:
Post a Comment